1.1 “Дон Боско” Мэргэжлийн Сургалт-Үйлдвэрлэлийн Төвийн /цаашид “сургууль” гэх/ үндсэн чиг үүргээ хэрэгжүүлэх үйл ажиллагааны нийтлэг зарчим, бүрэн эрх, бусад байгууллагатай харилцах хэм хэмжээг тодорхойлж, сургуулийн үйл ажиллагааг зохицуулахад энэхүү дүрмийн зорилго оршино.
1.2 “Дон Боско” Мэргэжлийн Сургалт-Үйлдвэрлэлийн Төв нь USAID болон Герман улсын төслийн тусламж дэмжлэгтэйгээр Салишны байгууллагын 100%-ийн хөрөнгө оруулалтаар үүсгэн байгуулагдсан ашгийн төлөө бус, төрийн бус байгууллага юм.
1.3 Сургуулийн зорилго: Монгол улсын Боловсролын тухай багц хууль болон түүнтэй нийцүүлж гаргасан хууль тогтоомжийн хүрээнд, нийт өсвөр үеийнхэн ялангуяа чадваргүй, сур дорой залууст хүмүүнлэгийн болон мэргэжлийн өндөр ур чадварын боловсролыг орчин үеийн техник технологид суурилсан, хэрэглэгчдийн эрэлт хэрэгцээ, шаардлагад нийцсэн сургалтаар явуулж, хүмүүнлэг, ардчилсан нийгмийн үзэл төлөвшил бүхий иргэдийг бэлтгэн гаргахад сургуулийн эрхэм зорилго оршино. Эдгээр иргэнийг бэлтгэхийн тулд бид Гэгээн Дон Боскогийн оюунлаг мэргэн, сурган хүмүүжүүлэх арга (preventive system ) болон ухаанаар хөтлөгдөн ажиллана.
1.4 Сургуулийн үндсэн зорилт нь: Иргэний сонирхол, авъяас, чадварыг харгалзан хөдөлмөрийн зах зээлийн эрэлт, шаардлагад нийцсэн мэргэжил эзэмшүүлэх замаар хүн амд үзүүлэх боловсролын түвшин, мэргэжлийн сургалтын хүртээмж, чанарыг дээшлүүлэхэд оршино.
- i. Мэргэжлийн анхан шатны мэргэжлийн боловсрол болон бүрэн дунд боловсрол олгох
- ii. Суралцагчдыг амьдрах ухаанд сургах, ирээдүйн зорилго тэмүүлэлтэй иргэн болгох
- iii. Суралцагчдыг өв тэгш хүмүүжилтэй иргэн болгон төлөвшүүлэхэд чиглэгдэнэ.
1.5 Сургууль нь өөрийн эрхэлж буй мэргэжлийн сургалт, техникийн боловсрол олгох ажлын түвшин цар хүрээнээс хамааран “МЭРГЭЖЛИЙН СУРГАЛТ-ҮЙЛДВЭРЛЭЛИЙН ТӨВ” гэсэн хэв шинжтэй байна.
1.6 “Дон Боско” Мэргэжлийн Сургалт-Үйлдвэрлэлийн Төв нь хуулийн этгээд бөгөөд /Монгол улсын хууль тогтоомжийн дагуу албан ёсоор бүртгэгдэж сургалтын үйлчилгээ, эрхлэх зөвшөөрөл авсан/ зохих журмын дагуу үйлдсэн тэмдэг, албан бичгийн хэвлэмэл хуудас, эмблем, уриаг хэрэглэнэ. Эмблемийн утга учрыг тайлбарлавал:
- i. Гадуур хүрээлсэн зургаан талт зөв өнцөг нь боолтыг дүрсэлсэн дүрслэл буюу техникийн болоод мэргэжлийн харилцаа холбоо тасралтгүй үргэлжилнэ гэдгийг бэлэгдэнэ.
- ii. Монгол гэр нь тус сургуулийг Монголын залуу үеийнхэний төлөө үйл ажиллагаагаа бүрэн зориулж буйг илэрхийлнэ.
- iii. Дон Боскогийн хөрөг зураг нь анхны үүсгэн байгуулагч бөгөөд залууст боловсрол олгох, тэдэнд сурах сонирхол төлөвшүүлэх арга замыг илэрхийлнэ.
- iv. Дэлгэсэн гарын алга нь мэргэжлийн ур чадвар, дадал хүмүүжилтэй иргэд болгон төлөвшүүлэхийг илэрхийлнэ.
- v. Бидний уриа “Бид амьдралд бэлтгэж байна”. Энэ нь үнэнч шударга иргэд, хариуцлагатай гэр бүлийн гишүүдийг бэлтгэх тус сургуулийн зорилгыг давхар илтгэнэ.
1.7 Сургуулийн нэр/хаяг:
- Сургуулийн нэр:“Дон Боско” Мэргэжлийн Сургалт -Үйлдвэрлэлийн Төв
- Сургуулийн хаяг: Улаанбаатар - Тш/х-694
- Утас: +976 (11) 460963, +976 (11) 460965
- Факс: +976 (11) 460964
- Оршин байгаа нутаг дэвсгэр: Баянзүрх дүүргийн 13-р хороо
- Нарны зам 135, 137, 137/1
ХОЁР. СУРГУУЛИЙН СУРГАЛТЫН ҮЙЛ АЖИЛЛАГАА
2.1 Мэргэжлийн боловсрол эзэмшүүлэх сургалт нь “өдөр” гэсэн хэлбэртэй байна. Тус сургууль нь үндсэн сургалтын зэрэгцээ чадамжинд суурилсан модулиар шинээр мэргэжил эзэмших, давтан сургах, мэргэшлийн ур чадвар дээшлүүлэх болон тусгай зориулалтын богино хугацааны сургалтуудыг хөдөлмөрийн зах зээлийн эрэлт, суралцагчийн хэрэгцээ сонирхолд нийцүүлэн зохион байгуулна.
2.2 Сургалтын стандарт, төлөвлөгөө, хөтөлбөр, индекс нь Боловсролын асуудал эрхэлсэн төрийн захиргааны төв байгууллага буюу Мэргэжлийн боловсрол, сургалтын мэргэжил-арга зүйн төвөөс баталсан сургалтын стандарт, төлөвлөгөөг мөрдөнө.
2.3 Сургуулийн хичээлийн жилийн үргэлжлэх хугацаа нь Боловсролын асуудал эрхэлсэн төрийн захиргааны төв байгууллагаас тогтоосон журмын дагуу байна.
2.4 Мэргэжлийн боловсрол эзэмшүүлэх сургуулийн үйлдвэрлэлийн сургалтыг сургуулийн дадлагын газар дахь сургалт, үйлдвэрлэлийн нөхцөл дэх сургалт, төгсөлтийн өмнөх дадлага гэсэн байдлаар зохион байгуулах ба аж ахуйн нэгж дээр дадлагын зааварлагч буюу дадлагын удирдагчийн хяналтын доор, сургууль дээр мэргэжлийн багшийн удирдлаган доор сургалтын хөтөлбөрийг тогтоосон хугацаагаар явуулна.
2.5 Суралцагчийн мэдлэг, чадварыг Боловсролын асуудал эрхэлсэн төрийн захиргааны төв байгууллагаас баталсан үлгэрчилсэн журам, “Дон Боско”–ийн preventive system (урьдчилан хамгаалах тогтолцоо)-ийг үндэслэн боловсруулсан “Дон Боско” МСҮТ-д суралцагчийн мэдлэг, чадварыг үнэлж дүгнэх журам”-ын дагуу суралцагчийг үнэлж дүгнэнэ.
2.6 Суралцагч элсүүлэхдээ Боловсролын асуудал эрхэлсэн төрийн захиргааны төв байгууллагаас баталсан хяналтын тоо, үлгэрчилсэн журамд нийцүүлэн боловсруулсан журмын дагуу элсэлтээ авна.
2.7 Төгсөгчдөдөө Боловсролын асуудал эрхэлсэн төрийн захиргааны төв байгууллагаас тогтоосон журмын дагуу мэргэжлийн боловсролын үнэмлэх, мэргэжлийн үнэмлэх олгоно.
2.8 Суралцагчдийн суралцсан байдлын талаар холбогдох мэдээ, нотолгоог суралцагч оюутны хүсэлтээр саадгүй гаргаж өгнө.
2.9 Сургуулийн нэгж хэсгийн удирдлага, бусад албан тушаалтан, багш, ажиллагсдын үйл ажиллагааг ажлын байрны тодорхойлолт, тэдэнтэй байгуулсан хөдөлмөрийн гэрээгээр зохицуулна.
2.10 Байгууллагын бүрэн эрх:
- i. Сургуулийн ажлын зөвлөлийн үйл ажиллагааг тус зөвлөлийн хурлаар баталсан журмаар;
- ii. Багш ажилчдын зөвлөлийн хурлаар хамт олны хүрээнд хэлэлцэх бүхий л асуудлыг хэлэлцэх буюу багштай холбоотой асуудлыг багш нарын зөвлөлийн хурлаар, ажилчидтай холбоотой асуудлыг ажилчдын хурлаар;
- iii. Багш нарын зөвлөлийн ажил ба тэнхимийн үйл ажиллагааг сургалт арга зүй судалгааны зөвлөлийн хурлаар;
- iv. Сургуулийн хөдөлмөрийн дотоод журмыг захирлын зөвлөлөөр баталснаар тус тус хэрэгжүүлнэ.
ГУРАВ. СУРГУУЛИЙН ЭРХ, ҮҮРЭГ
3.1 Сургууль нь Боловсролын тухай хууль, “Мэргэжлийн боловсрол, сургалтын тухай хууль”, бага дунд боловсролын тухай хуульд заасан нийтлэг эрх эдэлж, үүрэг хэрэгжүүлэхээс гадна дараах эрх үүргийг мөрдлөг болгоно.
3.2 Сургуулийн эрх:
- i. Багш ажилчдын ажлыг дүгнэх, оюутан, сурагчдын мэдлэг чадварыг үнэлэх, сургуулийн онцлогт тохирсон журмыг боловсруулж мөрдөх;
- ii. Багш нарын гүйцэтгэх сургалтын ажлын хэмжээ, ажилтнуудын ажил үүргийн хуваарь, ажлын байрны тодорхойлолт, дотоод журам, оюутны хичээлийн хуваарийг сургалтын сургуулийн онцлогт тохируулж мөрдөх;
- iii. Үйлдвэр дээр хийх дадлага, төгсөлтийн өмнөх дадлага, төгсөлтийн шалгалтыг зохион байгуулахын тулд мэргэжлийн болон бусад байгууллагаас туслалцаа авах, хамтран ажиллах гэрээ хэлцэл байгуулах;
3.3 Сургуулийн үүрэг:
- i. Сургалтын агуулга, арга зүй, технологийг боловсронгуй болгох;
- ii. Багш нарын боловсрол, мэргэжлийн ур чадварыг сайжруулах;
- iii. Сургуулийн үр ашиг чанарыг дээшлүүлэх;
- iv. Сургалт үйлдвэрлэлийн шаардлага хангахуйц орчинг бүрдүүлэх;
- v. Суралцагсад, ажил олгогчдын хэрэгцээнд нийцсэн мэргэжилтнийг бэлтгэх уян хатан тогтолцоог бүрдүүлэх
- vi. Хөдөлмөрийн ерөнхий болон мэргэжил эзэмших хэрэгцээг хангахад дэмжлэг үзүүлэх;
- vii. Өмч хөрөнгийн хадгалалт хамгаалалтыг сайжруулж, санхүүгийн чадавхийг дээшлүүлэх ажлуудыг шударгаар явуулах
- viii. Сурган хүмүүжүүлэх орчинг бүрдүүлэх
ДӨРӨВ. СУРГУУЛИЙН УДИРДЛАГА
4.1 Сургууль хамтын удирдлагын зарчмыг хэрэгжүүлэх зорилгоор удирдах зөвлөл (Итгэмжлэгдсэн зөвлөл, Ажлын зөвлөл), захирлын зөвлөл, багш ажилчдын зөвлөл, сургалт-арга зүй, судалгааны зөвлөл, оюутны зөвлөл ажиллана.
4.2 Сургуулийн удирдах зөвлөл нь Итгэмжлэгдсэн зөвлөл (“Board of trustees”) ба Ажлын зөвлөл гэх босоо удирдлагатай 2 зөвлөлөөс бүрдэнэ.
4.3 Сургуулийн “Board of trustees” (Итгэмжлэгдсэн) зөвлөлийн эрх, үүрэг
4.3.1 Сургуулийн дээд удирдлагыг “board of trustees” зөвлөл хэрэгжүүлнэ. Итгэмжлэгдсэн зөвлөлийг сургуулийн үүсгэн байгуулагчийн итгэмжлэгдсэн төлөөлөлтэйгээр байгуулна.
4.3.2 Төлөөлөгчийн бүрэлдэхүүнд итгэмжлэгдсэн төлөөлөгчид буюу үүсгэн байгуулагчаас, бусад нь үйл ажиллагааг хамтран хэрэгжүүлэгчийн талаас бүрдсэн бүтэцтэй байна. Итгэмжлэгдсэн зөвлөл нь Монгол улсын боловсролын хууль, бусад хууль тогтоомжид заасан эрх, үүргийн хүрээнд ажиллана. Итгэмжлэгдсэн зөвлөл нь ажиллах журмаа өөрөө баталж мөрдөнө.
4.3.3 Сургуулийг хөгжүүлэх бодлого, төлөвлөгөө хөтөлбөр, дүрмийг хэлэлцэж өөрчилж, батлах;
4.3.4 Сургуулийн жилийн төсөв санхүүг бүрдүүлж, хөрөнгө оруулалтын хуваарилалтыг баталж, зарцуулалтанд хяналт тавих;
4.3.5 Сургуулийн үйл ажиллагааны тайланг хэлэлцэж, үнэлэлт, дүгнэлт өгөх
4.3.6 Сургуулийн бүтэц, зохион байгуулалт, орон тоо, багш, ажилчдын цалингийн нийт хэмжээг тогтоох;
4.3.7 Удирдах зөвлөлийн үйл ажиллагааны ажлын тайланг жилд 2 удаа гаргаж үүсгэн байгуулагчид тайлагнах;
4.3.8 Сургалтын материал зарцуулалтын төлбөр бусад төлбөрийн хэмжээг ажлын зөвлөлтэй хамтарч зохих журмын дагуу тогтоох;
4.3.9 Ажлын зөвлөлийн гишүүдэд ажил үүргийн хуваарь гаргаж хариуцуулах, биелэлтийг хянаж зөвлөх;
4.4. Ажлын зөвлөлийн эрх, үүрэг
4.4.1 Сургуулийн өөрийн удирдлагыг Ажлын зөвлөл хэрэгжүүлэх ба дараах үүрэгтэй ажиллана.
4.4.2 Сургуулийг хөгжүүлэх бодлого, стратеги, ойрын болон хэтийн төлөвлөгөө хөтөлбөрийг боловсруулан хэлэлцэж Итгэмжлэгдсэн зөвлөлөөр баталгаажуулна.
4.4.3 Сургуулийн бүтэц, зохион байгуулалт, дүрэм журам, багш ажилчид, цалингийн хэмжээг тогтоож Итгэмжлэгдсэн зөвлөлөөр баталгаажуулна.
4.4.5 Ажлын зөвлөлийн жилийн төсвийн хуваарилалт, зарцуулалтын талаар итгэмжлэгдсэн зөвлөлд тайлагнана.
4.4.6 Ажлын зөвлөлийн үйл ажиллагааны жилийн тайланг гаргаж үүсгэн байгуулагчид өгнө.
4.4.7 Ажлын зөвлөлийн үйл ажиллагааны хэлбэр нь хурал бөгөөд гишүүдийн 51 хувиас доошгүй хувийн ирцтэй тохиолдолд хурлыг хүчинтэй тооцож, хэлэлцсэн асуудлаар олонхийн саналаар шийдвэр гаргаж, тэмдэглэл хөтлөнө. Гаргасан тогтоол шийдвэрээ итгэмжлэгдсэн зөвлөлөөр баталгаажуулна.
4.4.8 Ажлын зөвлөлийн хурлыг жилд 2-оос доошгүй удаа хийнэ. Харин ээлжит бус хурлыг Итгэмжлэгдсэн зөвлөлийн эсвэл 3-аас доошгүй гишүүний санаачлагаар хуралдуулж болно.
4.4.9 Ажлын зөвлөлийн хурлын товыг хурал болохоос 3-5 хоногийн өмнө зарлаж, нарийн бичгийн дарга нь холбогдох материалыг гишүүдэд хүргэнэ.
4.4.10 Ажлын зөвлөлийн хуралд хэлэлцэж байгаа асуудалтай холбогдуулан даргын зөвшөөрлөөр зөвлөлийн гишүүн бус багш, ажилчин, оюутны төлөөлөгчийг оролцуулан санал, хүсэлт тайлбарыг сонсож болно.
4.5 Сургуулийн ерөнхий захирлын зөвлөлийн эрх, үүрэг
4.5.1 Сургуулийн өдөр тутмын үйл ажиллагааг Итгэмжлэгдсэн зөвлөлөөс томилсон ерөнхий захирал удирдана. Сургуулийн ерөнхий захирал нь орон тооны байна. Мэргэжлийн сургуулийн захирал нь мэргэжлийн боловсрол сургалтын болон хөдөлмөрийн эдийн засгийн зохих мэдлэгтэй байна.
4.5.2 Ерөнхий захирал нь сургуулийн удирдлагыг Монгол улсын хууль тогтоомж, сургуулийн дүрмийн дагуу хэрэгжүүлнэ.
4.5.3 Захирал нь эзгүй байх хугацаандаа албан үүргээ сургуулийн дэд захиралд шилжүүлж гүйцэтгүүлнэ.
4.5.4. Захирал нь дараах эрхтэй байна.
- i. Багш, ажилчдыг сонгон авч ажилд томилох, өөрчлөх, ажлаас чөлөөлөх;
- ii. Сургалтын үйл ажиллагаатай холбогдох суралцагч, эцэг, эх, асран хамгаалагч болон зохих байгууллагад шаардлага тавьж шийдвэрлүүлэх;
- iii. Дотоод, гадаадын ижил төрлийн үйл ажиллагаа эрхэлдэг сургууль, аж ахуй нэгж байгууллагатай хууль тогтоомжийн дагуу гэрээ хэлцэл хийж, хамтран ажиллах;
- iv. Сургалтын үйл ажиллагааны дэвшилтэт арга, хэлбэрийг турших, нэвтрүүлэх;
- v. Холбогдох хууль тогтоомжид нийцүүлэн зохих шийдвэр гаргаж хэрэгжүүлэх;
- vi. Сургуулийн багш, ажилтны цалин урамшууллын бодлого, журам боловсруулж батлуулан мөрдүүлэх;
- vii. Суралцагч бүртэй суралцах гэрээ байгуулах;
4.5.5 Захирал нь дараах үүрэгтэй.
- i. Төрийн захиргааны төв байгууллагаас гаргасан тушаал, шийдвэрийг хүндэтгэн сургуулийн үйл ажиллагаандаа хэрэгжүүлэх эсэхийг шийдвэрлэх;
- ii. Мэргэжлийн боловсрол, сургалтыг хөгжүүлэх төрийн болон сургуулийн алсын бодлогод нийцүүлэн сургуулиа хөгжүүлэх чиглэл, хөтөлбөр боловсруулан Захирлын зөвлөл, Сургалт-арга зүй, судалгааны зөвлөл, ажлын зөвлөлөөр хэлэлцүүлэн шийдвэрлүүлэх, гарсан шийдвэрийг хэрэгжүүлэх;
- iii. Сургуулийн хэвийн, тогтвортой ажиллах нэгдсэн зохицуулалт, удирдлагаар хангах тэдгээрийн үйл ажиллагааны чанарын талаар байнгын бүрэн дүүрэн мэдээлэлтэй байх, үр дүнг хариуцах;
- iv. Суралцагчдын амжилттай суралцах, эрүүл мэнд, аюулгүй байдлыг хангах, нийгмийн үйлчилгээнд хамрагдах нөхцөлийг бүрдүүлэх;
- v. Суралцагчиддаа дадлага хийх, сурч буй мэргэжлийн чиглэлээр ажлын туршлага эзэмшихэд зуучлах, төгсөгчдөө ажлын байр олоход нь туслах үйлчилгээ үзүүлэх;
- vi. Багш, ажилтны ажилд үүрэг даалгавар өгөх, багш ажилчдын тушаал дэвших, шинэ ажилчин сонгох, ажлаас гарах эцсийн шийдвэрийг гаргах;
- vii. Багш, ажилтныг үр бүтээлтэй ажиллах нөхцөл бүрдүүлж, хамт олныг төлөвшүүлэх, тэдний хөдөлмөр, нийгмийн асуудлыг шийдвэрлэх, тэдний мэргэшлийг дээшлүүлэх, хөгжүүлэх;
- viii. Сургуульийн үйл ажиллагааны чанарыг тасралтгүй сайжруулах бүтэц, механизмын тогтвортой ажиллагааг хангах;
- ix. Сургуулийн төсөв, санхүүгийн үйл ажиллагааг төлөвлөх, эх үүсвэрийг бүрдүүлэх, сургалтын орчныг бэхжүүлэх, төсөв санхүүгийн хөрөнгийн зарцуулалтын дагуу үр ашигтай зарцуулах;
- x. Сургуулийн санхүү, нягтлан бодох бүртгэл, статистикийн мэдээ, тайланг хугацаанд нь үнэн зөв гаргах ажилд хяналт тавих;
- xi. Сургуулийн гадаад хамтын ажиллагааг бэхжүүлж, сургалт, судалгааны түншлэлийг өргөжүүлэх;
- xii. Багш, ажилчид, суралцагчидтай хамтран ажиллаж тэдэнд туслах, дэмжих;
- xiii. Иргэдийн боловсрол, соёлын төвшинг дээшлүүлэх болон нийгмийн халамж, хүмүүнлэгийн үйлчилгээ үзүүлэх;
- xiv. Сургуулийн багш, ажилчдын мэргэжлийн ёс зүйн дүрмийг баталж, хэрэгжилтийг хангуулах;
4.5.6 Захирлын тушаал
- i. Сургуулийн захирал нь Боловсролын тухай хууль, Мэргэжлийн боловсролын тухай хууль, Төрийн бус байгууллагын тухай хууль, Хөдөлмөрийн тухай хууль, бусад хууль тогтоомжид нийцүүлэн сургуульийн дотоод үйл ажиллагаатай холбогдсон асуудлаар тушаал гаргана.
- ii. Захирлын тушаалын дугаарыг тухайн жилийн 01 сарын 01-ний өдрөөс 12 сарын 31-ний өдрийг дуусах хүртэл хугацаанд дараалсан тоогоор алгасалгүй, давхардуулалгүй дугаарлана.
- iii. Тушаалын хэрэгжилтэнд дэд захирал, сургалтын албаны дарга, санхүүгийн менежер, сургалтын менежерүүд хяналт тавьж, хэрэгжүүлсэн эсэхийг ерөнхий захиралд мэдээллэж байна.
4.6 Захирлын зөвлөлийн эрх, үүрэг
4.6.1 Сургуулийн сургалт үйлдвэрлэл, санхүү, аж ахуйтай холбоо бүхий асуудлыг хамтын удирдлагын үндсэн дээр шийдвэрлэх зорилгоор захирлын зөвлөл ажиллана.
4.6.2 Захирлын зөвлөлийг ерөнхий захирлын санал болгосноор Итгэмжлэгдсэн зөвлөлд танилцуулж батална.
4.6.3 Сургуулийн жил, сарын ажлын төлөвлөгөөг хэлэлцэж батлан түүний хэрэгжилтийг зохицуулна.
4.6.4 Сургуулийн санхүү аж ахуйг бэхжүүлэх, төлөвлөгөө төсөвийг зохистой зарцуулах асуудлыг хэлэлцэх
4.6.5 Сургуулийн бүтэц удирдлага зохион байгуулалтыг тогтоож нэгж хэсгийн удирдлагыг хэлэлцэж томилох, тэдний ажлын үр дүнг хэлэлцэж үнэлэлт дүгнэлт өгнө.
4.6.6 Төрийн захиргааны төв байгууллагатай холбоотой ажиллаж тайлан, мэдээг цаг тухайд нь гаргаж байна.
4.6.7 Захирлын зөвлөл нь сар бүр 1 удаа хуралдаж сарын төлөвлөгөөнд тусгагдсан асуудлыг хэлэлцэж шийдвэрлэнэ. Зөвлөлийн хэлэлцсэн асуудалд гаргасан шийдвэрийн дагуу захирлын тушаал гарч хэрэгжилтийг зохион байгуулна. Захирлын зөвлөлийг сургуулийн гүйцэтгэх захирал удирдана.
4.7 Сургалт-арга зүй, судалгааны зөвлөлийн эрх, үүрэг
4.7.1. Сургууль нь бүс нутгийн хөдөлмөрийн зах зээлийн болон салбар үйлдвэрлэлд нэвтэрч байгаа шинэ техник технологийн судалгаа, төгсөгчдийн ажил эрхлэлтийн судалгаа зэрэгт үндэслэн сургалт-үйлдвэрлэлийн ажлын чиглэлийг тогтоох, түүний онол арга зүй, судалгааны ажлыг ерөнхий удирдлагаар хангах үндсэн чиг үүрэгтэйгээр “Сургалт-арга зүй, судалгааны зөвлөл”-тэй байна.
4.7.2. Сургалт-арга зүй, судалгааны зөвлөл нь нийгмийн түншүүд, бааз үйлдвэр, салбарын төлөөлөгчид болон сургуулийн сургалтын менежер, салбарын ахлагч, заах аргын нэгдлийн багш нараас бүрдэнэ. Зөвлөлд орох багшийг сургуулийн ерөнхий захирал сонгож батална.
4.7.3. Сургалт-арга зүй, судалгааны зөвлөлийн үйл ажиллагааны үндсэн хэлбэр нь зөвлөлийн нийт гишүүдийн хуралдаан байна. Сургалтын албаны дарга нь сургалт-арга зүй, судалгааны зөвлөлийг удирдана.
4.7.4. Сургалт-арга зүй, судалгааны зөвлөлийн ажиллах журмыг ерөнхий захирлын тушаалаар батална.
4.7.5. Зөвлөл нь дараах үндсэн үүргийг хэрэгжүүлнэ.
- i. Нийгмийн эрэлт хэрэгцээнд тулгуурлан сургалтын үйл ажиллагааг зохион байгуулах;
- ii. Сургалттай холбоотой судалгааны ажил хийх;
- iii. Сургалтын төлөвлөгөө, хөтөлбөр стандартад анализ хийх;
- iv. Сургалтын агуулга арга зүйг боловсронгуй болгох асуудлыг хэлэлцэж тогтоох;
- v. Үйлдвэр сургалтын газар ажиллах дүрэм журмыг тогтоох, батлуулах;
- vi. Улсын болон анги дэвших, элсэлт, төгсөлттэй холбоотой бүхий л журмыг боловсруулах, батлуулах, хэрэгжүүлэх ажлыг зохион байгуулах;
- vii. Ном сурах бичгээр хангах, сургалтын материалаар хангах;
- viii. Сурагчдыг үнэлэх, дүгнэх журмыг тогтоож мөрдүүлэх;
4.8 Багш нарын зөвлөлийн эрх, үүрэг
4.8.1. Сургуулийн үндсэн багш бүр нь багш нарын зөвлөлийн гишүүн байна.
4.8.2. Багш нарын зөвлөлөөр хамт олны хүрээнд шийдэх асуудлыг хэлэлцэх ба нийт гишүүдийн олонхийн саналаар шийдвэрлэнэ. Санал тэнцсэн тохиолдолд зөвлөлийн даргын шийдвэрийг үндэслэнэ.
4.8.3. Багш нарын зөвлөл нь дараах эрх эдэлж, үүрэг хүлээнэ.
- i. Багш нарын зөвлөл нь /цаашид “зөвлөл” гэх/ боловсрол сургалтын талаар сургуулийн хэмжээнд баримтлах бодлого шийдвэрийг зөвшин хэлэлцэх, хэлэлцсэн асуудлаараа тодорхой санал шийдэл гарган зөвлөлдөж болно.
- ii. Зөвлөл нь сургалт хүмүүжлийн ажлын чанарыг сайжруулах, зохион байгуулалтыг боловсронгуй болгох, сургалтын технологийн горимыг сахиулах, сургуулийн төсөв хөрөнгийн үр ашгийг дээшлүүлэхтэй холбогдсон асуудлыг гаргах, сургуульд мөрдөгдөх дүрэм журам зааврыг баталж мөрдүүлэх ажлыг зохицуулна.
- iii. Зөвлөлийн бүрэлдэхүүнд бүх багш, ерөнхий захирал, /дэд захирал/ сургалтын албаны дарга, менежерүүд орно.
- iv. Зөвлөлийн дарга нь сургуулийн ерөнхий захирал байна. Нарийн бичгийн дарга нь сургалтын менежер байна.
- v. Зөвлөл нь хэлэлцэж буй асуудлаа олонхын саналаар шийдэх бөгөөд санал тэнцвэл зөвлөлийн даргын саналаар шийдвэрлэнэ.
- vi. Зөвлөлийн хуралдааны талаар тэмдэглэл хөтөлж дарга, нарийн бичгийн дарга нар гарын үсэг зурна.
- vii. Зөвлөлөөр хэлэлцэж шийдвэрлэсэн асуудлыг захирлын тушаалаар баталж мөрдүүлнэ.
4.9 Суралцагч оюутны зөвлөлийн эрх, үүрэг
4.9.1. Суралцагчдын боловсрол дээшлүүлж хөгжүүлэх, чөлөөт цагийг үр бүтээлтэй өнгөрүүлэх, нийгмийн асуудалд дэмжлэг үзүүлэх сургуулийн үйл ажиллагаанд суралцагч оюутны зөвлөл нь өөрсдийн зүгээс хамтран ажиллах үндсэн үүрэгтэй болно.
4.9.2. Суралцагч оюутны зөвлөлийн ажлыг сургуулийн үйл ажиллагаатай уялдуулан зохицуулах зорилгоор зөвлөж, туслалцаа үзүүлэх, шийдвэрт нь хяналт тавьж ажиллах үүргийг сургалтын албаны дарга, сургалтын менежерүүд хариуцан ажиллана.
4.9.3. Суралцагч оюутны зөвлөлийн бүрэлдэхүүн, түүний ажиллах журмыг суралцагч оюутны зөвлөл боловсруулж, сургалтын албаны дарга, сургуулийн ерөнхий захирлаар батлуулан мөрдөнө.
4.9.4. Суралцагч оюутны зөвлөлийн өдөр тутмын ажлыг суралцагчдын нийтийн хурлаар сонгогдсон тэргүүлэгчид, тэргүүлэгчдээс сонгогдсон суралцагч оюутны зөвлөлийн дарга удирдана.
ТАВ. СУРГУУЛИЙН ЗОХИОН БАЙГУУЛАЛТЫН БҮТЭЦ
5.1 Сургууль нь өөрийн үйл ажиллагааг хэвийн, тогтвортой явуулах нөхцөлийг бүрэн дүүрэн хангасан сургуулийн Итгэмжлэгдсэн зөвлөлөөс батласан “Байгууллагын ерөнхий бүтэц”-тэй байна.
5.2 Сургуулийн зохион байгуулалт бүтцийн нэгж болох “Сургалтын алба”-тай байна. Сургалтын алба нь техникийн болон ерөнхий эрдмийн тэнхим, албан бус боловсролын гэж хуваагдана.Тэнхим нь дотроо салбартай байна.
5.3 Сургуулийн сургалт-үйлдвэрлэл, арга зүй судалгааны ажлыг анхан шатны нэгжид хэрэгжүүлэх, удирдлага зохион байгуулалтаар хангах, хяналт үр дүн шинжилгээ хийх зөвлөн туслах үүргийг тэнхим хариуцна.
5.4 Сургалтын албаны бүтэц, зохион байгуулалт
- i. Сургуулийн сургалт-үйлдвэрлэл, арга зүй судалгааны өдөр тутмын ажлыг сургалтын алба удирдан зохион байгуулна.
- ii. Сургалтын албаны бүрэлдэхүүнд сургалтын албаны дарга, сургалтын менежерүүд ажиллана.
- iii. Сургалтын албаны дарга нь сургуулийн сургалт-үйлдвэрлэлийн ажлыг төлөвлөх, агуулга арга зүйн ажлын бодлого чиглэлийг боловсруулах, хэрэгжилтийг зохион байгуулах, хяналт тавих мэргэжлийн удирдлагаар хангах албан тушаалтан болно.
- iv. Сургалтын алба нь жилд нэг удаа захирлын зөвлөл, багш нарын зөвлөлд ажлаа тайлагнаж байна.
- v. Сургалтын албаны даргын ажлын чиг үүргийг түүний ажлын байрны тодорхойлолтоор зохицуулна.
- vi. Сургалтын менежер нь сургалтын албаны даргын шууд удирдлаганд ажиллана.
5.5 Сургалтын алба дараах эрхтэй
- i. Багшийг сонгож авах сонгон шалгаруулалтад оролцож албаны зүгээс санал, дүгнэлт өгөх;
- ii. Сургалтын үйл ажиллагаатай холбоотой асуудлаар суралцагч, эцэг, эх, асран хамгаалагчид шаардлага тавьж шийдвэрлүүлэх;
- iii. Дотоод, гадаадын ижил төрлийн үйл ажиллагаа эрхэлдэг сургууль, аж ахуй нэгж байгууллагатай холбоотой ажиллах;
- iv. Сургалтын үйл ажиллагааны дэвшилтэт арга, хэлбэрийг турших, нэвтрүүлэх;
- v. Сургуулийн багш, суралцагч, сургалтын үйл ажиллагаанд хяналт тавих, үнэлгээ, дүгнэлт өгөх;
5.6 Сургалтын алба дараах үүрэгтэй.
- i. Мэргэжлийн боловсрол, сургалтыг хөгжүүлэх төрийн болон сургуулийн алсын бодлогод нийцүүлэн сургуулиа хөгжүүлэх чиглэл, хөтөлбөр боловсруулах;
- ii. Холбогдох яам тамгын газраас гарсан албан бичиг, тушаал, шийдвэрийг хүлээн авч хэрэгжүүлэх ажлыг зохион байгуулах;
- iii. Сургалттай холбоотой бүхий л асуудалд хяналт тавьж ажиллах;
- iv. Сургуулийн Итгэмжлэгдсэн, Ажлын зөвлөл болон бусад зөвлөлөөс гаргасан шийдвэрийг хэрэгжүүлэх;
- v. Сургалтын үйл ажиллагаатай холбоотой суралцагч, эцэг, эх, асран хамгаалагчдын санал бодлыг хүлээн авах;
- vi. Суралцагчдын амжилттай суралцах, эрүүл мэнд, аюулгүй байдлыг хангах, нийгмийн үйлчилгээнд хамрагдах нөхцөлийг бүрдүүлэхэд чиглүүлэх;
- vii. Суралцагчдаа дадлага хийх, сурч буй мэргэжлийн чиглэлээр ажлын туршлага эзэмшихэд зуучлах, төгсөгчдөө ажлын байр олоход нь туслах, тухайн үйлчилгээнд хяналт тавих;
- viii. Багшийн үр бүтээлтэй ажиллах нөхцөл бүрдүүлэхэд санал бодлоо илэрхийлж, тэдний мэргэжлийг дээшлүүлэхэд анхаарах;
- ix. Сургуулийн үйл ажиллагааны чанарыг тасралтгүй сайжруулах;
- x. Сургуулийн статистикийн мэдээ, тайланг хугацаанд нь үнэн зөв гаргах;
5.7 Тэнхимийн эрхлэгч нь сургалтын менежер байна.
5.8 Тэнхимийн ажлыг өдөр тутмын шуурхай удирдлагаар хангах үүргийг сургалтын албаны дарга, сургалтын менежерүүд хариуцна.
5.9 Тэнхим нь ажлаа сургуулийн жил, сарын ажлын төлөвлөгөөнд тусгаж хэрэгжилтийг зохион байгуулна.
5.10 Тэнхим нь салбартай байх ба салбарын ахлагч нь сургалтын менежерт хариуцлага хүлээнэ.
5.11 Салбарын ахлагчийг ерөнхий захирал сонгоно.
ЗУРГАА. БАГШ, АЖИЛТНЫ ЭРХ ҮҮРЭГ
6.1 Сургуулийн багшийн албан тушаал нь гүйцэтгэж байгаа ажлын чиглэлээс хамаарч онолын, дадлагын, онол дадлага хосолсон болон ерөнхий эрдмийн багш гэж ангилагдана. Багш тухайн албан тушаал /ажлын байрны тодорхойлт/-д хамаарах ажил үүргийг захирал буюу түүний эрх олгосон этгээдтэй байгуулсан хөдөлмөрийн гэрээний үндсэн дээр гүйцэтгэнэ.
6.2 Багш нь Боловсролын тухай хуулийн 44.1, 44.2 дугаар зүйл, Мэргэжлийн боловсрол, сургалтын тухай хуулийн 18, 19 дүгээр зүйл болон сургуулиас батласан дүрэм, журамд заасны дагуу эрх эдэлж, үүрэг хүлээнэ.
6.3 Багш, ажилчид нь сургуулиас баталсан “Багш, ажилчдын ёс зүйн дүрэм”–ийг үйл ажиллагаандаа мөрдлөг болгоно.
6.4 Ажилчид нь Монгол Улсын Хөдөлмөрийн тухай хууль тогтоомж, сургуулийн хөдөлмөрийн дотоод журам, хөдөлмөрийн гэрээ, ажлын байрны тодорхойлолтод заагдсан эрх эдэлж, үүрэг хүлээнэ.
ДОЛОО. СУРАЛЦАГЧИЙН ЭРХ ҮҮРЭГ
7.1 “Дон Боско” МСҮТ-ийн суралцагч оюутан элсүүлэх журмын дагуу тэнцсэн суралцагчийг Боловсрол соёлын газар, төрийн захиргааны төв байгууллагаас баталсан хяналтын тоонд багтаан захирлын тушаалаар элсүүлнэ.
7.2 Суралцагч нь Боловсролын тухай хуулийн 45.1, 45.2 болон Мэргэжлийн боловсрол, сургалтын тухай хуулийн 17 дугаар зүйлд заасны дагуу эрх эдэлж, үүрэг хүлээнэ.
7.3 Суралцагч нь сургуулиас баталсан “Суралцагчийн ёс зүйн дүрэм” болон бусад дүрэм журмыг сургалтын үйл ажиллагаандаа мөрдлөг болгоно.
НАЙМ: СУРГУУЛИЙН ЗАХИРЛЫН ГАРГАХ ЗААВАР, ЖУРАМ, ШИЙДВЭР, ТҮҮНИЙ ҮЙЛЧЛЭЛ
8.1 Сургуулийн орчинд хэм хэмжээ тогтоож журамлах үндсэн баримт бичиг нь захирлын тушаал түүгээр баталсан бусад дүрэм, журам байна.
8.2 Хууль тогтоомжийн хүрээнд нийцүүлж гаргасан захирлын тушаал түүгээр баталсан бусад дүрэм журмыг тус сургуульд ажиллаж байгаа албан тушаалтан, суралцагсад дагаж мөрдөж, биелүүлэх үүрэгтэй.
8.3 Сургалт-үйлдвэрлэл арга зүй судалгааны ажлын чиглэл бүхий тушаал түүнтэй адилтгах баримт бичгийг сургалтын алба, ажилчдын орон тоо, цалин хөлс тогтоох эд хөрөнгө захиран зарцуулахтай холбогдсон тушаал, түүнтэй адилтгах баримт бичгийг Захиргаа аж ахуйн алба тус тус хариуцан, багш ажилчдын зөвлөлийн хурлаар боловсруулж захиралд танилцуулан баталж, мөрдүүлнэ.
8.4 Сургуулийн хэмжээнд бүтэц, зохион байгуулалт, сахилга дэг журмыг тогтоох, ажилтныг шагнаж урамшуулах, тэдэнд зэмлэл шийтгэл хүлээлгэх, ажилтныг шилж сонгох ажиллуулахтай холбогдсон тушаал түүнтэй адилтгах баримт бичгийг захирал боловсруулж Багш ажилчдын зөвлөлд танилцуулан зөвлөлийн гишүүдийн саналыг тусган баталж мөрдүүлнэ.
8.5 Энэ дүрмийн хүрээнд сургуулийн хэмжээнд үйлчлэх бусад хэв хэмжээ тогтоосон болон бодлогийн шинжтэй баримт бичгүүдийг мөрдөгдөнө.
8.6 Сургуулийн хэмжээнд захиргаа, ажиллагсад, суралцагчдын хоорондын хөдөлмөрийн болон бусад харилцааг зохицуулсан доорхи үндсэн баримт бичгүүд үйлчилнэ.
- i. Сургуулийн дүрэм
- ii. Сургуулийн хөдөлмөрийн дотоод журам
- iii. Захиргаа, ажиллагсадын хоорондын хөдөлмөрийн гэрээ
- iv. Багш, ажилчдын ажлын байрны тодорхойлолтууд
- v. Багш ажилчдын ёс зүйн дүрэм
- vi. Суралцагчийн ёс зүйн дүрэм
- vii. Сургуулийн сургалт-үйлдвэрлэлийн үйл ажиллагаатай холбогдсон дүрэм журмууд
ЕС: СУРГУУЛИЙН САНХҮҮ, АЖ АХУЙ, НИЙГМИЙН ХАНГАМЖ
9.1 Өмчийн хэлбэр харгалзахгүйгээр нэг оюутанд ноогдох хувьсах зардлыг төсвөөс санхүүжүүлнэ.
9.2 Сургуулийн эх үүсвэр нь үүсгэн байгуулагчийн хөрөнгө, нэг сурагчид ноогдох хувьсах зардлыг төрөөс санхүүжүүлсэн хэсэг, сургалтын төлбөр, хандив, хөнгөлттэй зээл, өөрийн үйл ажиллагааны орлогоос бүрдэнэ.
9.3 Сургууль нь нэг суралцагчид ноогдох зардлын хэмжээ болон хувьсах зардлыг тооцсон дүнгээр төсөв зохиож холбогдох газраар батлуулж мөрдөнө.
9.4 Сургууль нь өөрийн хөрөнгийг үр ашигтай зарцуулах, нөөц бололцоог ашиглах замаар бий болгосон бодит хэмнэлт, мэргэжлийн сургалтаар хийсэн зүйлсийг борлуулснаар сургалтын орчинг сайжруулах, багш, ажилчдын нийгмийн асуудалд дэмжлэг үзүүлнэ.
9.5 Сургууль нь санхүүгийн орлогоо нэмэгдүүлэхийн тулд бусад аж ахуйн нэгж байгууллага, иргэдтэй гэрээ хэлэлцэл байгуулах, илүүдэлтэй байр талбайгаа түрээслүүлэх, аж ахуйн бусад үйл ажиллагааг эрхэлж болно.
9.6 Сургуульд хандивласан хөрөнгийг сургуулийн санхүүгийн тайланд тусгаж, зориулалтын дагуу ашиглана. Сургуульд хандивласан хөрөнгө нь хууль ёсны дагуу эх үүсвэртэй байна.
9.7 Мэргэжлийн боловсролын сургалтын байгууллагын суралцагчийн үйлдвэрлэлийн сургалт, дадлагын зардлыг сургалтын байгууллага, аж ахуйн нэгжийн хооронд байгуулсан гэрээгээр зохицуулна.
9.8 Суралцагчийн сургууль дээрх үйлдвэр сургалтын хичээлд зарцуулагдах материалын зардлын хэмжээг Ажлын зөвлөл тогтооно.
9.9 Сургууль нь 2 жил тутамд санхүүгийн үйл ажиллагаандаа аудитын болон санхүүгийн хяналтын эрх бүхий байгууллагаар шалгалт хийлгэнэ.
АРАВ: ДҮРЭМД НЭМЭЛТ, ӨӨРЧЛӨЛТ ОРУУЛАХ, ХҮЧИН ТӨГӨЛДӨР БОЛГОХ
10.1 Сургуулийн дүрэмд нэмэлт, өөрчлөлт оруулах санаачлагыг Ажлын зөвлөл, сургалт-арга зүй, судалгааны зөвлөл болон захирлын зөвлөлийн гишүүд, түүнчлэн багш ажилтан, суралцагч нь Ажлын зөвлөлд гаргаж болно.
10.2 Сургуулийн дүрэмд нэмэлт, өөрчлөлт оруулах асуудлыг Ажлын зөвлөлийн хурлаар хэлэлцэж батлах бөгөөд баталсан тухай шийдвэр гаргаснаар хүчин төгөлдөр болно.
